政情：小肥張 波叔 利益申報冇影

行會申報有時限

根據行會申報利益嘅規定，成員喺委任之初及其後每一年，都需要申報個人利益，成員所申報嘅利益如有變更，必須於變更有效日期起計十四日內通知行會秘書處，有關申報亦會上載行會網頁。而成員就新擁有嘅利益，亦必須作出通知，就本港以外地區擁有土地同物業，就要喺變更有效日期起計廿八日內通知，截至目前為止，小肥張同波叔已經上任超過一個月，但行會網頁上仍未見到佢哋嘅申報。

眾所周知，小肥張係司局長當中嘅「樓王」，根據舊年底嘅資料顯示，佢喺香港擁有九項物業，包括兩個位於中西區嘅住宅單位，其中一個連車位，五個位於東區嘅住宅單位，以及兩個分別位處中西區及東區嘅商業單位；至於波叔就申報太太同家人持有一個位於灣仔嘅單位連同兩個車位，以「偉活發展有限公司」持有，而佢太太喺澳洲悉尼全權擁有一個住宅連一個東位同一個儲物格作出租之用，波叔係有關單位按揭貸款嘅聯席借款人。

其實，佢哋本身已有全份資料，簡單嚟講，只需要改下個職位上載多次就完全搞掂晒，但佢哋上任超過一個月，行會申報嘅網頁都仲未有得睇。波叔升任財爺時，外界狠批佢唔夠班，唔知點寫份預算案出嚟，唔通因為要瞓身寫預算案，所以唔記得申報？

秘書處稱已收到

我哋問過政務司司長同財政司司長兩個辦公室，佢哋話已經交咗申報資料，而行會秘書處發言人亦回覆話已收到佢哋嘅資料，處理好就會放上網嘞！係咁嘅話，遲啲大家要金睛火眼，睇吓佢哋嘅申報資料同之前嗰份有幾大分別喇。