中環出更：施家殷防盜心法 財不可露眼

話說一班當年總理譚健業、陳嘉華同任俊彥等傾起旅行遇劫經歷，陳嘉華就透露早前喺法國畀人偷咗部只係買咗無幾耐的電話，搞到三個月內被迫買兩部電話。不過唔好以為歐洲先係咁，譚健業就試過喺大家都覺得好安全嘅日本遇竊，佢話有次凌晨一點幾經過新宿，都畀人喺背囊偷咗部電話，不過好彩，偷咗一部，佢仲有兩部，事關佢每次去旅行都會帶定兩、三部電話，返工同私人用途都好，方便可以漫遊上網吖嘛！

梁紹安（中）按照傳統喺落莊後續任樂善堂常務總理繼續幫手，旁為陳健平（左）同陳嘉華。

楊小玲（左）同李玉佩（右）話三月會有今屆最後一個大型籌款活動。（徐家浩攝）

電話多資料 外遊必定跟身

施家殷同任俊彥就好好彩未試過旅行畀人偷嘢，施家殷話電話入面除咗有相片之外，仲有好多聯絡資料，非常重要，所以每次都會好小心保管，尤其旅行財物一定會跟身，仲教路「財不可露眼」，貴重嘢唔好放衫外面嘅袋，要放內袋，而就算換電話佢都唔會丟掉，驚資料外洩，所以一直留番晒喺屋企。至於有跑開步嘅任俊彥就笑言畀人偷嘢，一定會好似跑馬拉松咁追住個賊幾個鐘，又笑指唔會着得太靚去旅行。

呢日現身嘅仲有副主席楊小玲、前主席梁紹安、常務總理陳婉儀、蘇裕康同陳健平等。講起四月就會換屆，施家殷話目前籌款數字近二千萬元，扣除成本後比舊年增加近百分之五十，非常滿意。常務總理李玉佩則會趁換屆前嘅短短時間，籌備今屆最後一個大型籌款活動甜心行動，喺全港多區義賣糖果。

卓妮