講起香港嘅大學生，以前就係天之驕子，令人好生羨慕，家陣唔少人就變咗怒火青年，甚至淪為政治爛頭蟀，令人大搖其頭。連自己人都有呢種睇法，咁就唔怪得外國人覺得香港不宜求學喇。
嗱，國際高等教育研究機構QS公布今年世界最佳求學城市排名，根據「院校排名」、「學生國際化程度」、「可負擔性」、「渴望程度」、「學生視角」等多個範疇作出比較，結果唔使審都知，香港排名又插水嘞，繼前年排名第五跌至去年第八後，今年又跌至第十一，已經連續兩年下跌，落喺首爾同東京之後，想唔認衰都唔得。排名跌跌不休嘅主因係污染及貪腐等生活質量「渴望程度」評分差強人意，學生國際化程度不足，加上生活成本及學費水平令人難以負擔，外國學生咪怕怕囉。
真係冇講錯o架，淨係空氣污染問題咋，港府搞極都搞唔掂，藍天白雲愈叫愈走，唔少外資都係因為咁而走夾唔抖；至於貪腐咯喎，睇吓近年接連有高官鋃鐺下獄，前特首又惹上官非，就知廉潔香港早已變成傳說嘞。仲有喎，香港生活成本超高，衣食住行超貴，尤其係大學唔夠宿位，唔少外國學生只能屈居棺材房，簡直攞苦嚟辛。再講吖，香港大學學費一啲都唔平，隨時拍得住歐洲知名大學，既然物非所值，為乜仲要山長水遠嚟香港讀書喎。
不過咁，上面嗰啲原因都係小菜一碟啫，如果院校質素呢個主菜夠吸引，相信外國學生都唔介意來港求學嘅。可惜吖，本港大學嘅國際排名近年好似食咗瀉藥咁，一瀉再瀉，跌到趴街，特別係龍頭學府香港大學，試過喺某排名榜插水式暴跌四十幾級，簡直慘不忍睹。院校質素不濟，生活環境又差，自然冇乜外國學生願意屈就，學生國際化程度不足又有乜出奇吖。
搞成咁，咪就係象牙之塔政治化累事囉，有啲學生醉心街頭，好勇鬥狠；有啲教師不務正業，誤人子弟，仲邊有心機讀書做研究喎。睇吓今年各大院校學生會「上莊」嘅情況就知啦，幾乎個個莊都以港獨、自決、暴力抗爭做主打，大學校園儼然港獨大本營、政治鬥獸場，連放下一張安靜嘅書桌都難。可憐天下父母心，畀着你係家長，都唔放心仔女嚟香港讀書喇，吓話？
冇計嘞，自從佔領之亂開始，成個社會陷入政治狂熱，香港由福地淪為亂地，乜嘢匪夷所思嘅事都會發生，校園政治化只係冰山一角咋，國際競爭力江河日下先至最大鑊。大學洋校長就話可以拍拍屁股鬆人啫，少數有錢人就話可以移民啫，香港呢個爛攤子都唔知可以靠邊個收拾咯。