政情：險燒屋留陰影吳永嘉廿年無下廚
立法會議員吳永嘉以愛好杯中物廣為人知，又多應酬經常需要外出用膳，一睇就知佢好少下廚，絕非「住家男」。佢亦承認，自己已經好多年冇下廚，連雞蛋都有成二十年冇煎過，原因竟然係同多年前一宗事故有關。
吳永嘉透露，喺九十年代曾經試過獨居，當時見啲廚具洗乾淨後好耐都未乾透，於是喺爐頭上開火將廚具烘乾，點知佢顧住睇電視而唔記得睇火，直至廚房傳出陣陣（火羅）味先發現幾乎火燒屋！
可能因為有陰影，自此之後，佢就冇再下廚煮嘢食，只係間中煮過即食麵啫！
脊骨移位 唔使洗碗
雖然吳永嘉唔會下廚，但佢仍然熱愛美食，直言「食嘢真係好開心」，而開心嘅原因除咗係可以品嘗美食之外，亦因為唔使洗碗而感到高興。佢話自己喺屋企「攞正牌」唔使洗碗，又因為年輕時曾傷過腰骨，脊骨出現移位，所以唔能夠長期維持同一個動作，同時亦令佢唔能夠坐得耐。