政情：范國威新東翻盤無望 下屆謀戰九西

搭定人脈鋪後路

之前已經有消息流傳，一眾泛民打算報名參與兩區嘅初選，目的係唔畀范國威借補選翻盤。唔知係咪因為咁，佢要諗定後路，有消息話佢搵埋退出公民黨（公文袋）冇耐嘅立法會議員毛孟靜（阿毛）幫手，密謀轉區出選。聽講佢哋最近仲整咗新橫額，橫額上有齊佢哋嘅嘜頭，打算以「香港本土」嘅名義掛喺九龍西。

阿毛同范國威早喺一三年一齊搞咗個叫「香港本土」嘅組織，聲稱係推動本土議題，亦曾經試過一齊拖篋抗議添！而阿毛退出有份創立嘅公文袋後，亦已用番「香港本土」個牌頭，佢亦曾經喺接受傳媒訪問時講過，話覺得范國威係好人選，仲話如果對方出戰補選，會全力幫手助選。

其實，政圈盛傳年屆六十嘅阿毛打算做埋今屆就收山，據聞佢喺公文袋時已經唔妥被黨捧緊嘅油尖旺區議員余德寶。依家佢退咗黨，就更加唔想留番個位畀公文袋，加上佢嘅前心腹、公文袋執委李俊晞又冇跟埋佢一齊走，所以搞到佢搵唔到人接班。

咁啱得咁蹺，范國威本身同民主派有好多牙齒印，搞到班民主派都打算密謀唔畀佢出戰補選。唔知係咪預料自己出唔到補選，翻盤無望，再加埋知道阿毛搵唔到人接班，所以唔排除佢哋依家要未雨綢繆，索性行孖咇，等范國威有得走位。

風險大隨時「跌死」

范國威喺今屆立法會選舉中已經輸咗本身喺新界東嘅議席，而且阿毛喺九龍西嘅票，又唔知有幾多係佢嘅、有幾多係公文袋嘅，所以范國威空降九龍西，風險好大，甚至隨時跌死。之不過，政治一日都嫌長，何況係四年後嘅嘢，大家放長雙眼睇吓會點？