中環出更：去旅行帶埋番薯 王惠貞為食唔怕重
去旅行通常會帶啲乜嘢？除咗衫褲鞋襪之外，可能係啲杯麵等乾糧喇，之但係中華總商會副會長王惠貞（Connie）竟然係帶番薯。除咗山長水遠，亦好重啫！唔怕重嘅原因只有一個，就係啲番薯好味囉！
卓妮早前喺中總嘅午宴上見到Connie，佢話農曆新年期間去咗海南島，但唔係因為海南島新年有乜特別，只係佢喺當地有間度假屋，而啲朋友平時喺北方住，過年難得一齊搵個地方聚吓就選擇去海南島，佢仲特登喺東莞買咗啲番薯帶去，同班朋友一齊煨番薯，不知幾滋味。
赴海南島度假 玩煮飯仔
幾日流流長，喺間屋入面玩乜呢？玩煮飯仔囉！原來佢哋最大嘅興趣係下廚，成班朋友親自落手包餃子，享受下廚樂，而除咗食嘢之外，佢哋亦不忘做運動，一齊打吓乒乓波。
另外，會長蔡冠深當日亦簡介來年多項工作大計，包括四月份喺越南胡志明市舉辦博鰲論壇；暑假搞少年太空人體驗營，及年尾喺遮打花園舉辦一帶一路文化節，將一帶一路國家嘅特色美食同文化帶到香港。而佢原來喺大年初一當日亦身在越南，話當地新年同香港有啲唔同，佢哋拜年係唔需要買好多禮盒，只係兩手空空去探訪朋友飲吓茶，而除咗花市，佢哋仲有大型書展，當中好多係同歷史同軍人故事有關，笑言港人新年唔會買「輸」，但越南人就會喇！
轉頭仲見到副會長李應生、楊華勇、常董范仁鶴及選任會董梁香盈。楊華勇啱啱由澳門回港，話澳門過年都有「撈起」食，近近哋去咗兩日就返嚟。身兼百成堂集團主席嘅李應生就話希望未來多推廣藥膳畀年輕人認識，因為好多中藥除咗有醫藥用途之外亦可以成為美饌，希望下屆政府繼續關注中藥發展。
卓妮