政情：長毛擬選特首 未入閘先出事

立會會議室開記招涉違例

今屆行政長官選舉指引列明，候選人不得動用公共資源為自己進行競選活動，如因職位或工作關係而無可避免動用，亦須計算相關費用納入選舉開支。另一參選人葉劉淑儀亦係立法會議員，但佢就自行租地方做競選辦公室去進行記者會等競選活動，所以長毛尋日喺立法會嘅會議室開記者會宣布有意參選特首，已經涉嫌違反咗指引。

另外，立法會行政管理委員會早前通過，喺上年立法會提名期至選舉結果公布期間，議員不得使用立法會大樓設施作競選活動。雖然有關決定係針對立法會選舉，但據悉有行管會成員亦指有關限制應包括特首選舉，所以行管會下周一將舉行會議，討論特首選舉期間議員用唔用得大樓設施做競選活動。講白啲，即係以防立法會資源畀長毛濫用囉！

今屆民主派選委只有三百多票，即使全投長毛，最多只夠他入閘，根本無望當選。但係長毛聲稱唔係出嚟「攪局」，而係等大家「有得揀」，又話會收集市民支持，更呼籲民主派選委不要投票給現時主要嗰四名特首參選人添！