政情：鄭國漢「心中只有嶺南」
政治風暴席捲大學校園，大學校長成為「惡啃」職位，其中香港大學校長馬斐森上任唔夠三年就劈炮，跳船去蘇格蘭愛丁堡大學做校長。有人辭官歸故里，但係有人就攬住唔想放手，下年任期屆滿嘅嶺南大學校長鄭國漢就想繼續留低。佢尋日出席新春傳媒團拜時，懶理肉麻咁話「心中只有嶺南」，又表示希望將手頭工作繼續做落去，擺到明想爭取續約。
近年大學校園多次掀起政治風暴，兼且港獨思潮急速擴散，位於風眼嘅港大就發生副校長任命風波同禁錮校委事件，而學生會亦有迹象走港獨同暴力路線，校長馬斐森可能都嗅到（火羅）味，因而寧願減薪雞咁腳走都唔奇。嶺大校長鄭國漢尋日就話早前開八大校長會時，唔見馬斐森有異樣，對佢嘅決定感到突然，又指對方為人風趣同有能力，話佢離開係香港嘅損失添！
親中立場惹火 與學生關係差
其實除咗港大，嶺大亦唔平靜，好似當年鄭國漢上任校長時，當時嘅學生會不滿遴選過程唔透明，加上佢嘅親中政治立場，表明唔會承認佢係校長，去到今屆學生會依然以「所謂嘅校長」去稱呼佢，可見雙方關係毫無改善；另一方面，亦曾因反對特首擔任大學校監嘅問題，逾百學生圍堵校董會，搞到校董要席地同學生對話添！再講，今屆學生會會長鄭沛倫更因「佔領西環」行動而被帶返警署調查。校園變得咁風風火火，身為校長嘅鄭國漢都好難處理。
暫未獲邀留任 曾言不談政治
鄭國漢嘅校長任期到下年八月屆滿，但佢冇好似馬斐森咁離開是非之地嘅諗法，反而想攬住校長職位唔放。被問及去留問題時，佢好坦誠咁話「希望有機會將目前嘅工作繼續做落去」，回應有冇人邀請佢加入特首競選班底時，更懶理肉麻咁話「心中只有嶺南」，渴求續約之情表露無遺。不過，佢承認校董會仲未同佢傾續約嘅事，個人最終係去係留都要等校董會公布。
現時本港校長無可避免要面對政治考驗，但係鄭國漢喺一三年上任時講明唔會評論任何政治議題，即使佢保到校長份工，能唔能夠抵禦校園內嘅政治風暴同港獨思潮氾濫等問題，實在令人懷疑。