中環出更：專家助查「倒旗」風波 鄭松泰凍過水
熱血公民議員鄭松泰早前趁建制派議員拉隊離場發動流會時，把建制派座位上嘅五星旗及區旗倒轉，被質疑違反國旗及區旗法，立法會其後選出有關調查委員會，七名成員最終全為建制派，委員會或會邀請熟悉五星旗及區旗法嘅專家協助，如果最後證明指控屬實，且經全體三分之二議員支持通過動議，鄭松泰便會喪失議員資格，睇嚟鄭松泰都係凶多吉少嘞！
梁美芬料一年內完成調查
調查委員會主席梁美芬尋日同傳媒茶敍時話，預計委員會最快喺下周五開會，由於今次涉及五星旗，相信委員會好可能會邀請熟悉相關法例嘅專家協助，如果調查順利，預計最快可於半年內完成調查，倘若中途遇上阻滯，亦會喺一年內完成調查工作。
梁美芬又話對上一次成立同類嘅委員會，係幾年前處理動議譴責立法會前議員、民主黨甘乃威行為不檢嘅事件，今次委員會亦參考上次經驗，或會涉及取證等工作，屆時會邀請鄭松泰作供，鄭可以選擇有律師陪同，而調查方向，相信會觸及議員豁免權範圍、事件係咪涉及刑事等作調查。
卓妮