中環出更：中總玩微信 貼地又年輕
香港中華總商會（中總）尋日舉行新春酒會，一眾政商界名流齊去互道恭喜。新年流流好意頭，中總乘機舉行微信帳號啟用禮，仲即場玩「紅包」派利是抽獎遊戲，現場氣氛好高漲。中總會長蔡冠深笑笑口話，未來工作重點係年輕化同國際化，開微信平台就係想貼近年輕人，唔好令有百幾年歷史嘅中總形象老化。
重返中總做會長嘅蔡冠深話喺上一屆任內曾提出「四化」，即年輕化、專業化、國際化同多元化，今屆特別要強調年輕化同國際化，至於國際化嘅重點係推動與「一帶一路」沿線國家的合作。佢講笑話，如果中總再唔追求年輕化，就會好似佢咁老餅喎。
李應生話專注地區事務
今屆升呢做副會長嘅百成堂主席李應生（Tommy）都有一團火推動會務，佢負責中總嘅會員聯絡同愛心行動兩個委員會。Tommy話除咗擴大會員基礎之外，最緊要加深會員參與地區工作，所以中總已將全港七個地區嘅會員聯絡委員會，改名為地區事務委員會，日後專注社會同地區事務。佢笑笑口形容：「一句講晒，唔好離地，要貼地」。
講番引起高潮嘅微信派利是大抽獎活動，中總青委副主席林智彬（Lawrence）同黃進達都係幸運兒，有份攞到蔡冠深派嘅利是，認真好彩頭，難怪佢哋開心笑晒。Lawrence更加喜上加喜，事關已有兩個囝囝嘅佢，今個月底將添多個囡囡，仲揚言可以收工喇！
卓妮