政情：新年收陰司紙 姚松炎乘機勸捐
新年流流，個個都想收利是，利是利是，好意頭嘛，但有人竟然收到陰司紙，認真唔老利嘞！講緊嗰個就係遭政府入稟覆核議員資格嘅立法會建築界議員姚松炎。
姚松炎尋日喺社交網站fb上載相片，自爆收到多張陰司紙同信件，相信係有人寄去立法會嘅，而寄件人更喺信中「提醒」佢要留低一部分錢，將來攞嚟作司法覆核同埋上訴之用，用詞都相當狠毒，但姚松炎就似乎未有被嚇怕，唔單止冇理會信中嘅內容，反而藉收陰司紙乘機呼籲網友捐助「守護公義基金」，以協助包括佢在內等四名議員嘅覆核案官司。
佢又慨嘆任何捐助熱情都有冷卻嘅一日，直指新年過後基金仍未達五百萬港元籌款嘅目標，呼籲網友「詛咒之心可減，捐款之情不可滅」。