政情：貼文轉型講政治 鄺俊宇吸like變倒米
經常喺facebook（fb）貼出愛情文章嘅民主黨（白鴿黨）立法會議員鄺俊宇（鄺神），原來有做統計邊個時段有多啲like，仲打算喺呢個黃金時間貼上更多政策文章，吸引更多網民睇。之不過，咁做可能弄巧反拙，吸like變趕客。
晚上六點和九點最多人睇
鄺神喺網上貼文至少有三年時間，而喺呢幾年間，佢試過喺唔同時段貼出文章，測試邊個時段會多啲人睇。結果發現，原來傍晚六點幾同九點幾都係較多人睇，所以平日主要都喺呢兩個時段出文。佢又分析，六點幾嘅時段較多人會like，甚至有啲人未睇就畀like。翻睇佢平時六點幾貼出嘅文章，幾乎普遍都有逾千個like。
除咗愛情小品外，佢話未來可能會出多啲政策文章，吸引多啲讀者睇。但話說回頭，其實愛情小品較政治文章更多人睇，以早前佢同民建聯周浩鼎喺立法會工務小組鬧交嘅片段為例，當時喺較早時段上載fb都只有二百多個like，收視麻麻。睇怕佢若果喺黃金時段時貼出政策文章前都要諗清楚先，分分鐘變相幫自己倒米，吸唔到like之餘又少咗follower呀！