政情：跪低！港台新大樓 拋「共用」方案
爭議多多嘅香港電台（港台）「超豪」嘅新廣播大樓，雖然由六十億元造價減磅到五十三億元都仍然被否決後，一直都冇新進展，商務及經濟發展局局長蘇錦樑只係推說要等港台畀方案。足足拖咗三年終於「跪低」，新大樓方案推倒重來，原本喺將軍澳預留土地上，堅持興建整棟新大樓，依家佢哋就考慮同其他政府部門共用，但係邊啲部門就冇透露。
與政府部門商討相關問題
適逢新一年新氣象，廣播處長梁家榮尋日喺港台新春團拜上透露，為咗做到「地盡其用」，依家就新大樓事宜同政府部門傾緊共用嘅問題，同埋佢哋準備緊新大樓嘅草圖，希望遲啲有實質情況公布。梁家榮嘅任期仲有一年半，被問到工程會唔會喺佢任期內開始，佢回應話盡量，同埋要視乎各程序係咪順利進行。佢仲話整個工程有好多過程要做，包括設計草圖、計算成本同公眾諮詢等，未來會盡力游說持份者同立法會議員。
港台現有位於廣播道嘅大樓面積狹窄、設施又陳舊、仲要一落雨就會隨時上演「水舞間」，有直播室「假天花」出現漏水、塌下嘅情況，影響運作。上年四月接手埋亞洲電視嘅模擬頻譜後，大樓使用情況就更加緊張。不過依家佢哋打算新大樓同其他政府部門共用土地，似乎變相將之前嘅計劃推倒重來，遲吓又要排隊上立法會，真係唔知幾時先可以解決到問題。
令人質疑想玩綑綁式撥款
講開又講，最近立法會工務小組審議緊嘅基本工程儲備基金，政府將九千幾項小型或前期工程綑綁埋一齊，變成廿幾個項目，當中具有爭議性嘅橫洲公屋項目都有份。非建制派議員都話要抽番有爭議嘅項目出嚟，仲會拉布，搞到無傷大雅嘅項目都受牽連。
事隔三年，建材漲價，到時新大樓整個工程造價隨時仲貴過五十三億，如果港台真係同其他部門共用，不難令人質疑係咪想玩綑綁式撥款，到時唔排除又出現拉布，甚至會被抽起撥款申請。咁搞法，分分鐘由「跪低」變「瞓低」喎。