中環出更：移民台灣？ 胡炎松話旅行就夠
好多香港人都鍾意去台灣，早前有報道指港人去年移民台灣人數創十六年來新高，卓妮尋日喺香港潮屬社團總會新春團拜活動上見到一班城中名人，當中會董胡炎松就啱啱去完台灣頭城，了解當地搶孤嘅設施。
胡炎松話台灣頭城係玩搶孤玩得比較激烈的地方，參賽者利用一塊布圍住自己條腰，徒手爬上直徑跟油桶差不多，高數十呎的柱上搶孤，由於柱上塗滿牛油， 最快都要七分幾鐘先可爬到上頂，而佢今次就係去了解佢哋點打造嗰條柱嘅地基。講起依家好多港人移民台灣，佢就估計因為大家言語上相通，加上又近，好多嘢都好方便，但佢冇打算喺嗰度購買物業，得閒去吓旅行就夠喎。
馬介欽無諗過喺當地投資
香港潮屬社團總會副主席馬介欽亦啱啱喺新年期間去咗台北同宜蘭，佢話好鍾意食台灣菜，而佢同好多港人一樣，去旅行都係志在放假嗰種輕鬆嘅心情，至於去邊個地方或者食啲乜嘢都唔係最重要。佢又話好鍾意去台灣旅行，但冇考慮過喺當地投資食肆或者生意。
同場仲有該會會長兼有「小巴大王」之稱嘅馬亞木同做常董嘅兒子馬僑生、會董陳光明同青委會主席張俊勇等。講起台灣，陳光明喺台灣有生意，話說佢早前將香港嘅懷舊粒粒雪糕引入台灣同新加坡，大受年輕人歡迎，原來港人食慣嘅懷舊食物，去到其他地方可能都會覺得新奇，所以佢仲將香港嘅分子雪糕品牌都引入埋台灣西門町同新加坡，所以頻頻飛台灣咁話。
而家族早前以六億元喺銅鑼灣購入全幢物業嘅馬僑生就話，經濟一般嘅情況下都會分散投資喺唔同方面，好似佢哋除咗小巴外亦有商場等，預計怡和街物業暫時會用作收租。
卓妮