政情：陳淑莊收冥鈔 嘲「唔好嘥錢」
新正頭人人希望有好意頭，點知立法會議員陳淑莊（Tanya）嘅辦事處大年初七「開爐」，竟然收到兩張面額共二百萬嘅冥鈔，認真大吉利是！不過Tanya就話百無禁忌，仲向特首參選人曾俊華抽水，指對方搞眾籌半日都只係籌得一百七十萬，唔夠佢一開工就有二百萬咁多喎！
附恐嚇字句信件
Tanya將有關冥鈔上載到facebook，除咗兩張面值一百萬嘅冥鈔外，亦見有疑似恐嚇信，寫上類似「自殺」、「司法覆核」等字眼。不過Tanya似乎未有被冥鈔同信件嚇倒，反而話「百無禁忌」，仲喺張相加埋「唔好咁嘥錢」、「好無聊」等等標籤。唔少網民留言支持Tanya，又建議佢報警；有人就講笑話寄冥鈔嘅人出手低，因為舊年另一名議員劉小麗都收過冥鈔，但面額有五千萬咁多添喎！
