政情：當係報告工作平台 新任司長鬥寫千字文 網誌悶親人
近年唔少政府高官沉醉於寫網誌，寧願隱身於字海之中，亦唔願意多啲出嚟同各界面對面溝通。由勞工及福利局局長升呢為政務司司長嘅張建宗，同埋由發展局局長升呢為財政司司長嘅陳茂波（波叔），最近就齊齊鬥長氣寫網誌，不過佢哋將網誌變成交代自己工作「流水帳」同政績嘅平台，仲每篇網誌動輒超過千幾二千字，真係被佢哋悶親。
講起寫網誌，辭職參選特首嘅前財政司司長曾俊華係其中一位愛好者，喺九年司長生涯之中，一共寫咗約四百三十篇網誌，當中唔少涉及私人生活。例如○七年第一篇網誌，就講到屋企人嘅支持；其後亦提到自己學洪拳、睇足球賽等趣事，都叫做冇咁悶。
波叔曾被嘲「發展局博客」
不過，佢嘅繼任者波叔就有唔同嘅風格。波叔任發展局局長時，好鍾意喺網誌回應同解釋政策，有時面對社會嘅質疑同批評，佢都寧願選擇喺網誌回應，唔現身回答，所以被外界嘲笑為「發展局博客」。以為佢妙筆生花、文采斐然，所以先至咁鍾意寫文章？錯喇！佢每篇網誌下下過千字，又解釋政策多過分享生活點滴或人生經驗。好似大年初二，佢以財政司司長身份寫嗰篇網誌，講完恭賀說話之後，又拉埋旅發局花車同旅遊業嚟講，「埋單」成一千四百幾字，睇完都覺得嘥時間同眼力。喺呢個睇圖多過睇字嘅年代，試問有幾多人捧場呢？
但係數到字多，政務司司長張建宗認第二，應該無人敢認第一。張建宗喺勞福局局長任內，已經將網誌變成工作報告，巨細無遺咁交代工作進度。佢升呢後，網誌字數亦隨之升呢，最近兩篇更突破二千字大關，真係少啲耐性都睇唔晒。
蕭偉強唔跟風 惜字如金
至於署理勞福局局長蕭偉強就幾乎同張建宗相反，佢只喺大年初一出過一篇網誌祝賀農曆新年，成篇文只有短短八十六字，可謂惜字如金。至於署理發展局局長馬紹祥似乎繼承咗前任風格，繼續將網誌當工作報告兼回應平台。
其實網誌如果係有深度嘅好文章，可以拉近人與人之間嘅距離；但係如果政府高官只當網誌係報告工作嘅平台，就真係同潮流脫晒節喇！