中環出更：楊華勇笑言自細儲利是錢娶老婆
農曆新年逗利是同食糖係大部分小朋友都會做嘅事，之但係逗完利是會點用就個個都唔同嘞！早幾日百仁基金舉行第八屆理事會就職典禮，唔知一班理事細個啲利是錢又點用？主席李文俊就話，細個啲利是錢絕對唔會亂咁使，會一直儲起到大個之後投資。副會長楊華勇就搞笑話，自從有意識大個咗要結婚之後，就將啲利是錢儲儲埋埋嚟做老婆本喎，真係識講笑。
今屆百仁基金由李文俊連任再做主席，好多名流紳士到場祝賀。有「鋼鐵公主」稱號嘅基金副主席陳寧寧都有現身，佢話細個嗰陣如果學業成績好，尤其考第一嘅話，祖父母畀嘅利是就會特別大封，以作獎勵，佢透露有成五百蚊咁多，當年嚟講好誇張。雖然係佢辛苦讀書得到嘅獎勵，但所謂獨樂樂不如眾樂樂，佢一於用嚟同同學一齊出去玩，將呢份開心同好朋友一齊分享咁話。身旁嘅副主席羅詠詩就打趣話，囝囝好鍾意同陳寧寧拜年，因為佢封利是好大封喎！不過阿仔想逗佢嗰封利是就唔簡單，事關一定要斟茶畀佢飲先有。
余偉傑兒時唔使上繳
同場仲有會長施榮忻、副會長林智彬、副主席曾智明同余偉傑。好多小朋友嘅利是錢都要畀父母保管，余偉傑就話細個唔需要上繳利是，都係自己決定點用，真係幸福。至於楊華勇依家已經有兩個小朋友，佢話現時都有幫小朋友儲住啲利是，第日等佢哋大少少，就會畀番佢哋自己學吓管理。
卓妮