政情：愛犬食錯嘢抱恙 麥美娟新年狂執金
唔少人都期望新一年會行好運，而立法會議員麥美娟（Alice）就已經喺新正頭遇上「遍地黃金」嘅情況，莫非佢一踏入雞年就咁有財運？
其實Alice所講嘅黃金係狗糞，因為佢嘅愛犬麥糖喺年初二肚瀉，連早餐都唔食，所以新正頭就搞到屋企遍地黃金囉！不過，好彩Alice唔使喺新年周圍撲獸醫咁辛苦，因為佢家中有藥頂檔。
Alice話麥糖一向都容易肚瀉，形容佢有「玻璃肚」，今次估計係誤食家中嘅年花先搞成咁。佢以前農曆新年都會準備供狗吃用嘅賀年食品，但因為麥糖有玻璃肚嘅關係，所以依家都冇再預備，只為兩隻愛犬着靚衫打扮應節就算喇！
另外，Alice尋日落區同市民拜年時，巧遇街坊帶同與佢愛犬同一品種嘅狗狗，成功吸引佢嘅注意，但狗狗就唔多畀面，喺Alice打算索抱時竟然請對方大食檸檬，好彩最後都有聽話獻吻，總算畀番幾分薄面Alice，仲氹到佢好開心添！