政情：盧偉國扮財神 吹色士風拜年
喺農曆新年，大家最想見到邊個？當然係財神喇！立法會議員盧偉國與梁美芬，聯同數名油尖旺區區議員，趁尋日大年初三到尖沙咀鐘樓同市民拜年。外形同財神最為相似嘅立法會議員張華峰（肥老闆）雖然冇現身，但依然有盧偉國頂上。佢仲好稱職，出動撒手鐧同市民拜年添！
盧偉國一身財神打扮，頭戴金色帽子現身，非常受歡迎。盧偉國呢個財神精通多樣樂器，更即場獻技，喺鬧市中吹奏色士風，為市民獻上《歡樂年年》等賀年歌曲。佢以財神打扮演奏西樂，又用西樂獻上富有新年氣氛嘅歌曲，實行用中西合璧嘅方法同市民拜年。
梁美芬大派黃色膠鴨
雖然梁美芬冇粉墨登場，但絕對冇畀盧偉國比下去，事關佢向圍觀市民大派金幣利是，所以同樣受歡迎。佢又向圍觀嘅朋友送上黃色膠鴨，取鴨嘅英文讀音Duck，恭祝市民雞年「一定得」，難怪小膠鴨咁搶手，好快派完。