政情：術數師：游蕙禎雞年無運行

黃之鋒有機會被捕

楊師傅表示，一九九六年出生嘅黃之鋒雞年「冇乜好運」，甚至可以用「崎嶇」來形容，農曆四至六月、九月及十二月均對其不利，其言行會令很多人不認同，有機會「畀人揼」，年尾會被左右夾擊，一方面做事會遇到壓力，另一方面有機會犯法被捕。與其同屬香港眾志、一九九三年出生嘅羅冠聰，農曆三、四月亦要小心健康及言論，否則有機會被喊打，甚至有刀傷，冬季即十至十二月亦「冇運行」。

一九七七年出生嘅朱凱廸雞年亦不利，農曆三、四月要注意健康及交通安全，說話要小心，九月易有人事之爭，原本支持佢嘅人會對其不滿，而七、八月及十一、十二月或有機會入院，故要小心身體及言論，否則或因健康或被打而入院。

游蕙禎點上訴都輸

至於已被取消議員資格嘅梁頌恆雞年運程反覆，農曆六月有機會「畀人揼」，九月人事關係及財政都有問題。一九八六年出生，今年三十一歲嘅佢如有心從政，四十歲後捲土重來就有機會做得好，四十歲前可說「冇機會」。同被取消議員資格嘅游蕙禎則幾乎全年「冇運行」，只有五、六月運程較佳。楊師傅又指，游蕙禎二十一至三十歲都係行傷官運，即容易惹官非、是非。今年佢流年不利，如有官非，「無論點上訴都唔會贏」。

另外，一九五六年出生、今年六十一歲嘅立法會議員梁國雄（長毛）為癸水命，用金水、忌火土，雞年丁酉年金旺，運氣唔錯，只有農曆九月對其不利。惟長毛嘅運氣至六十三歲就「玩完」，大運伏吟，如六十三歲後再惹官非，或唔會好似以前咁獲得輕判。睇嚟長毛要三思而後行喇！