中環出更：年年有「余」肉丸款客食過翻尋味
尋日大年初三沙田馬場人頭湧湧，除咗馬迷之外，都有唔少城中名人到場湊熱鬧，一齊感受節日氣氛。其中裕華董事長余國春就帶埋太太、兒子余偉傑及女兒余家裕等一齊入場。余國春同卓妮講，今個農曆新年佢哋一如以往，邀請晒一大班同事去佢哋屋企玩，有近八十人咁多，好開心㗎！而佢哋家鄉嘅賀年食品仲每年都極受歡迎添！
講起家鄉客家梅縣，余國春同阿仔余偉傑就話每逢農曆新年都會炮製客家炸肉丸宴客，由豬肉、鯪魚肉、薯粉、燒香過啲切粒章魚同蝦米等製成，浸黃酒食，非常香口，好多同事都話食過翻尋味，而因為到場同事人數眾多，佢哋淨係整肉丸都要整最少兩日時間呀！此外，余偉傑話仲有梅菜扣肉、雞酒等都係佢哋新年會食嘅嘢，過年真係大飽口福。
郭少明同囡囡最愛年糕
轉頭見莎莎主席郭少明同女兒郭詩慧及其丈夫陳振邦，今年佢哋一家就去咗日本東京度歲，啱啱先返港入場支持愛駒。郭少明笑言鍾意食甜多過食鹹，至愛就係年糕，而佢個女都係一樣，郭詩慧最難忘嫲嫲親手整嘅年糕，因為嫲嫲係水上人家，嗰種年糕味道係特別唔同喎。家鄉係東莞的陳振邦就認為用冬菇、雞同雲耳整嘅鹹湯圓最有特色，出面街買唔到咁話。
同場仲有南旋集團主席王庭聰、仁濟總理孫蔡吐媚及丈夫孫少文、中電企業發展總裁莊偉茵一家及廠商會副會長史立德同太太史顏景蓮等。新年難得開懷進食，身為福建泉州人嘅王庭聰就最愛蠔仔煎，仲識得煎添！史顏景蓮就話入完馬場之後，晚上會同老公及朋友等飛去泰國過一個熱辣辣嘅農曆新年，享受陽光與海灘。
卓妮