政情：惡搞廣告 賀年「陳」出不窮
嚟緊嘅星期六就係大年初一，唔少議員都喺呢幾日紛紛落區，多數都係寫揮春、派年曆同派利是封等同市民拜個早年。不過，立法會議員陳恒鑌（Ben）卻一反傳統，拉埋班嚟自新界西嘅兄弟姊妹一齊拍攝賀年短片，仲惡搞經典廣告向大家賀年。
農曆新年喜氣洋洋，片中嘅阿Ben同班兄弟姊妹全部身穿顏色鮮艷嘅中式唐裝，背景亦張貼上多張揮春，增添新年氣氛。其後，佢哋更喺廚房內分工合作製作湯丸，祝願市民來年一團和氣。
咪以為短片以食湯圓作結咁普通，因為短片最後一段就反高潮，惡搞經典染髮劑廣告，同樣以兩女一男嘅設定去拍攝，又將廣告中深入民心嘅對白，改為「逐漸發財又得，立即發財都得，得咗！」相信市民一聽對白，就知出自邊個廣告。
另外，近年亦有一個迷你倉廣告，因有外國人以半鹹淡嘅廣東話介紹熱線電話而為人熟悉。荃灣區議員古揚邦就掌握到呢個廣告嘅神髓，模仿得入木三分，整條賀年短片不失為誠意之作。