國務院尋日同日免去政務司司長林鄭月娥同財政司司長曾俊華（鬍鬚曾）嘅職務。等了又等，等咗三十幾日終於等到獲批辭職，但係鬍鬚曾並唔係好似林鄭咁仆到出嚟公布參選下一屆特首，反而只係發新聞稿，話喺休假期間就參選特首事宜做咗認真同詳細嘅考慮，日內會舉行記者會公布自己嘅決定。唔通鬍鬚曾仲喺度諗緊選定唔選？咁扭擰，究竟猶豫啲乜嘢呢？唔通係驚連閘都入唔到？
