政情：少年峯鴿留長髮 畀何漢權捉住剪
唔少人都話頭髮係「三千煩惱絲」，頭髮確實曾為立法會議員許智峯（峯鴿）帶嚟唔少煩惱。峯鴿話自己細個啲頭髮長過眼眉，曾經被當時作為訓導主任、現任教育評議會副主席何漢權，親手剪頭髮。
峯鴿話細個就讀屯門一間中學，當時都算百厭，而且有夾Band，所以頭髮都長過眼眉，當時就被何漢權捉到，其他同學有得揀係何漢權畀錢佢哋自己去剪髮，佢就冇得揀，只能係何漢權親手幫佢剪，仲形容當時剪到好短，剪得唔係咁好睇。佢又話依家工作上不時都有同何漢權交手，但初時對方都唔太認得佢，直至佢參選區議會時，何漢權先對佢有啲印象。
太多學生 梁美芬唔認得
講起老師唔認得自己，峯鴿話自己曾經就讀城大法律系，另一名立法會議員梁美芬教過佢，不過同樣唔認得佢，後來峯鴿同梁美芬講番，梁美芬先知道，佢仲引述梁美芬話自己嘅學生嚟自五湖四海喎。