政情：泛民玩杯葛 「送」鄭松泰一程
立法會議員鄭松泰喺舊年十月十九日，趁立法會會議點算法定人數期間，將建制派座位上嘅五星旗同區旗倒轉，被議員謝偉俊動議譴責，而立法會早前已通過成立調查委員會跟進。提名議員加入調查委員會嘅期限喺昨日午夜屆滿，截至尋日中午仍未有非建制議員獲提名，聽聞泛民政黨玩杯葛，唔通佢打算睇住鄭松泰死？
截至尋日中午，只有陳振英、張國鈞及陸頌雄等三名議員獲提名，供立法會主席任命為調查委員會成員，全部都係建制派議員。根據《議事規則》，調查委員會需要有正、副主席，以及五名委員，半數都未夠。因《議事規則》所限，動議議案嘅謝偉俊與聯署議員，以及議案所針對嘅議員、即鄭松泰都唔能夠加入調查委員會，到底調查委員會能否湊夠人數，結果就要到提名期屆滿先知道喇！
陸頌雄指「實夠人嘅」
陸頌雄就話各個建制派政黨都會有代表加入，形容調查委員會「實夠人嘅」。佢更不齒鄭松泰侮辱五星旗，所以建制派會就調查一事爭取主導權。而謝偉俊就話聽聞非建制打算杯葛，但仍相信調查委員會最終有足夠人數，但佢就批評非建制杯葛嘅做法並唔理想，有違政治倫理。
泛民稱太瑣碎無聊
公民黨黨魁楊岳橋承認該黨經討論後，決定唔參與調查委員會，因為所調查嘅事情太瑣碎無聊，認為毋須浪費寶貴嘅議會時間去跟進，而佢哋採取嘅態度，亦與○九年甘乃威被指行為不檢而遭動議譴責一事相似。另外，佢又否認做法係置鄭松泰於不顧，因表決譴責動議時，仍可喺分組點票下作出把關。
曾批評過鄭松泰嘅民主黨（白鴿黨），亦無意搵代表加入調查委員會。該黨議員林卓廷認為事件係建制派小題大做、係「搵嚟搞」，而且建制派一定佔調查委員會多數，所以並冇興趣參與。佢又話可以留待喺大會辯論時先幫手，唔需要浪費時間加入調查委員會。佢又重申，之前討論譴責動議時，都已經有幫口批評建制派，所以有關決定並唔係唔理鄭松泰生死咁話。
好明顯建制派要喺調查委員會攞主導權，但係非建制派係咪真係喺分組點票把到關？若果有乜差池，有幾個人缺席會議，咪又係送鄭松泰去死。