中環出更：馬清揚冰上揸車 全靠高人指點

東華早前與星夢郵輪協辦為期三日兩夜的慈善之旅，為該院的醫療、教育及社會服務籌募經費之餘，仲贊助該院嘅受助家庭一齊過一個海上假期。卓妮見到馬清揚，講起難忘假期，佢話早兩年喺芬蘭轉乘內陸機前往拉普蘭（Lapland），同太太及班朋友第一次喺結冰嘅湖上玩冰上駕車，話嗰度結咗冰嘅湖面上，劃分咗八個區域，因為地方好大唔會撞到其他車，但當佢哋一踩油就會即刻歪晒，好彩有師傅喺旁邊指導佢哋點樣控制，否則唔知會搞成點，呢次經歷好難忘。

轉頭見到主席馬陳家歡（Katherine），講起今次海上之旅非常興奮，原來佢係一名游水健將，讀書時仲曾經係游泳校隊嚟(口架)！Katherine話細個讀書時已經好鍾意游水，自己閒時都有玩吓水上活動，難怪生咗幾個小朋友之後身形都依然咁Fit啦，佢仲話小朋友細個學游水較容易學識，所以都會帶小朋友去學咁話。

馬陳家歡（左）讀書時係游泳健將，蘇祐安（右）則係旱鴨子。

李曠怡（左起）與嫲嫲及媽媽過去兩年都有坐郵輪。（葉華英攝）

蘇祐安唔識游水 坐船未驚過

不過唔係個個坐郵輪嘅都會識游水(口架)噃，佢身邊嘅東華執行總監蘇祐安就笑笑口話唔識游水，但冇有怕喎。

總理李曠怡就同媽媽李周美枝及嫲嫲一齊上船，原來佢哋一家過去兩年都有坐郵輪，事關李曠怡話嫲嫲好鍾意，仲話嫲嫲對上一個星期喺佢哋一齊去台灣旅行嗰陣，就已經好醒目咁發現咗「雲頂夢號」呢隻船，仲話有機會想坐吓，依家就即刻可以坐，今次真係啱晒佢嫲嫲心水啦！

卓妮