政情：公文袋年宵 謀賣AY攬枕
農曆新年就到，唔少政黨都會喺維園擺年宵攤檔賣嘢籌款。公民黨（公文袋）嚟緊都會喺維園年宵開檔，除咗賣過往都有賣開嘅tote bag（手提袋）之外，有人建議不如整佢哋新任黨魁、立法會議員楊岳橋（Alvin，AY）嘅攬枕，因Alvin喺黨內最有人氣，相信可幫公文袋帶來進帳咁話喎。
有聲音反對個人化
不過亦都有人反對，皆因唔想啲產品咁個人化。話時話，如果公文袋咁多位立法會議員都推出攬枕，唔知邊個成為賣剩蔗呢﹖
公文袋過往年宵生意算唔錯，除咗揮春受歡迎之外，佢哋曾經推出過嘅鳩嗚袋tote bag成績都好好，而去年嘅「香港人系列」咖啡杯、行李牌等都一早賣斷貨。最近佢哋又為年宵產品度橋，有人就建議推出Alvin攬枕，不過亦都有人反對，所以公文袋中人仍然十五十六緊。
其實如果唔想太個人化，或者可以出晒黨內五名議員嘅攬枕。不過如果有個別議員嘅攬枕最後剩得最多，又或者之後畀反對者拎嚟惡搞，就真係尷尬又攞嚟衰喇！