政情：立會大樓變甜品 陳維安（搲）晒頭
唔少店舖都會為產品改奇怪嘅名稱，都係想搵噱頭吸引顧客啫！好似大圍一間甜品店，竟然創出「立法會大樓配雪糕」，連立法會秘書長陳維安都對有甜品被命名為「立法會大樓」覺得不明所以同不知所措。
陳維安尋日喺facebook上載一個餐牌，餐牌上有一個疊高嘅水果窩夫配雪糕，名為「立法會大樓配雪糕」。陳維安話有個好友將呢個餐牌傳畀自己，據知係來自一間大圍甜品店，佢對於有店舖將甜品命名為「立法會大樓」都不明所以。
又好難怪陳維安會（搲）晒頭嘅，事關呢款甜品，橫睇掂睇都睇唔出邊度同立法會大樓相似，但就起咗呢個名。不過，唔似立法會大樓冇所謂，好唔好食都係其次，呢款甜品起碼做到吸睛同已經吸引到一班人去議論，咁間舖頭就收到宣傳嘅效果喇！
網民建議食咗先講
對於陳維安嘅疑問，有網民就留言，叫佢唔好諗咁多，索性買嗰款甜品嚟試一試，就會搵到答案，亦有人話要收版權費，更加有人建議將呢款甜品放喺立法會嘅咖啡角出售添！
_