政情：戴耀廷搞公投選特首 泛民死都唔撐
特首選舉即將喺三月舉行，民主派雖然喺早前嘅選委會選舉中取得三百二十幾席，不過選委唔團結，令到影響力大大減低，而佔領行動發起人、身兼高教界選委嘅戴耀廷更加係民主派唔團結嘅始作俑者。戴耀廷尋日就以公民聯合行動成員嘅身份召開記者會，倡議「二○一七特首選舉民間全民投票」，以公民提名嘅形式搵出特首候選人，兼建議選委參考民意進行投票。佢都承認並唔係個個民主派選委都同意佢個計劃，不過覺得自己個計劃更加符合民主目標。據了解，除咗戴耀廷，民主動力前召集人鄭宇碩又話搞「公民推薦」，搞埋咁多類似計劃，最終咪只會破壞團結囉！
繼搞出失敗收場嘅佔領行動同拖垮泛民立法會選情嘅「雷動計劃」之後，戴耀廷尋日又召開記者會倡議「二○一七特首選舉民間全民投票」，成個計劃需要眾籌一百五十萬港元去運作。佢話計劃會委託港大民意研究計劃同香港理工大學社會政策研究中心執行，若任何人能夠取得三萬七千多個市民，即百分之一嘅的登記選民人數支持，即可成為民投計劃嘅特首候選人，而所有官方同民間嘅候選人都會被納入投票程序，進行正向以及逆向投票，選出特首。
選委唔支持即「反民主」
戴耀廷話推行計劃嘅目的，係畀香港市民有機會參與，冀可延續上一屆特首民間投票嘅精神。佢多次強調無意影響選委決定、無意要求選委按民投嘅結果投票，但民間投票喺正式選舉一個星期前舉行，客觀效果其實係「夾」啲選委支持囉！
據了解，初步已有十幾個嚟自社福界嘅選委向戴耀廷表明會支持計劃，並按公投嘅結果投票，而撐場嘅衞生服務界選委葉劍青同代表社總嘅社福界選委許麗明都表明個人名義係支持計劃，更加有人話直接拎四萬個提名向選委顯示民意，如果選委唔支持就係「反民主」。
泛民憂削候選人數目
但傳統泛民似乎就對計劃非常不滿，有人就大鬧戴耀廷搞民間公投同鄭宇碩搞公民推薦，只會令中央政府提高選舉嘅安全系數，或者會將候選人數目減到只有一個或兩個，最終令民主派可以爭取嘅空間減少，變相浪費三百幾票。其實民主派喺今屆特首選舉，實在無分裂嘅本錢，好心戴耀廷唔好再搞咁多嘢破壞團結喇！