中環出更：Hea玩懷舊晚宴 陳克勤衫都唔帶
月底就係農曆新年喇！唔少團體都提早搞定新年聚餐，同各界好友預祝新一年可以有個好開始。立法會議員劉國勳（Edward）、陳克勤（克勤）同容海恩（Eunice）一齊出席由香港工商總會青年網絡舉辦嘅新年晚宴聚餐。大會今年決定搞搞新意思，各個出席嘉賓都要打扮一番，配合晚宴嘅懷舊主題。但Edward同克勤兩個嘅打扮同Eunice比起嚟，真係水皮啲喎，到底佢兩個搞乜呀？
Edward同克勤都好誠實，一開波就大大方方話自己今次打扮得有啲「Hea」。
劉國勳變身肥版許文強
Edward話自己專登揀咗件乾濕褸去，加埋頂帽就可以扮許文強，仲可以襯埋太太扮馮程程，同老婆成雙成對，但係佢就變咗肥版許文強囉！
至於克勤就認自己「懶啲」，連衫都無帶過去，好彩大會早有準備，為克勤安排咗一件唐裝衫，加埋頂帽就可以扮「洪爺」，順利配合番晚宴嘅懷舊主題。
其實，望一望Eunice就知佢早有準備，一身黑衣加埋個爆炸頭假髮，估佢都唔係「臨時拉伕」㗎喇！Edward同克勤你兩個要學吓人哋喇！
講明係懷舊之夜，除咗嘉賓嘅打扮之外，場景當然都要配合番喇，晚宴嘅場地除咗布置咗成間士多咁，仲擺咗一大堆懷舊糖果、小食、汽水同維他奶出來之外，同埋展出咗唔少嘅懷舊玩具，啲嘉賓都玩到唔捨得走人。
Edward同太太上台唱完首《上海灘》後，都忍唔住要同部懷舊遊戲機影相先肯返屋企，真係成個大細路咁！
卓妮