因政務司司長林鄭月娥辭職備選特首而升呢做署理政務司司長嘅勞工及福利局局長張建宗（小肥張），尋日出席活動時話，政府雖然面對唔同挑戰，但有三艘船包括「扶貧號」、「安老號」同「助弱號」已揚帆出海、乘風破浪，近五年來政府嘅福利開支勁增五成五，仲「跑贏政府嘅大市」喎！話時話，香港仲有好多問題需要公帑解決，何況扶貧、安老仲有大把爭議未解決，小肥張仲好意思自吹自擂，唔通佢因為升呢而得意忘形？
