政情：譚文豪捐軍褸 義賣最搶手
職工盟同三大空中服務員工會尋日舉辦一連兩日「接二連三二手衫義賣活動」，本身係民航機師嘅立法會議員譚文豪（Jeremy）捐出嘅美國空軍軍褸可謂最搶手，有市民活動一開始就走入義賣室，秒速用三百八十八蚊搶購，速度之快令人側目。
親身穿着做宣傳
點解件褸咁受歡迎？原來Jeremy早喺一個月前就拍片並上載到社交網站Facebook個人專頁，用「飛機師的風衣」做招徠幫軍褸做宣傳，仲做埋模特兒着上身，難怪有市民咁心水清啦！Jeremy話件軍褸係早前喺美國軍用店買，仲着過返立法會。佢喺短片中親自着軍褸上身，仲吸引一大班網友讚好添！
職工盟主席吳敏兒就話，活動主要為組織籌募營運經費，至於點解搵空中服務員工會合作，係因為空姐空少最識打扮，衣着品味有番咁上下，所以佢哋嘅二手衫應該會受市民歡迎喎！