政情：李梓敬讀法律 恨做容海恩師弟
舊年參選立法會新界東選舉落敗嘅深水埗區議員李梓敬，同現任議員容海恩針鋒相對，選舉過後，李梓敬對容海恩態度已一百八十度轉變，仲話為咗向目標進發，已決定重拾書本修讀法學博士課程，首選係入讀城大，除咗因為同自己選區好近之外，更加因為容海恩都係城大畢業，佢好想做容海恩師弟。
專業人士有市場
李梓敬話選舉過後覺得社會氣氛已經改變，市民已經唔再需要好似佢咁讀經濟出身嘅人，反而有法律背景嘅專業人士更有市場，於是「的起心肝」報讀法律博士課程。佢話暫時中大已取錄咗佢，但佢首選係城大，因城大法律系係由建制派議員梁美芬任教，而容海恩亦喺嗰度畢業。
咁讀完會否執業做律師？佢話暫時未決定，但作為中產區區議員，區內居民都對法律諮詢有好大需求，好似平安紙同法團問題等，識法律會更有力幫助居民，而將來如果出選立法會，法律背景亦有幫助喎。真係唔知話佢未雨綢繆抑或諗多咗好喇！