政情：泛民明撐劉梁 暗保議席
泛民主派騎劫咗今年嘅元旦遊行，用遊行期間籌得嘅捐款，資助劉小麗、梁國雄等四名被政府覆核資格嘅非建制議員打官司，但對於成功被政府踢出立法會嘅青年新政游蕙禎同梁頌恆，泛民就選擇袖手旁觀，態度大相逕庭。據聞泛民撐「劉梁」唔撐「游梁」，除咗涉及雙方對港獨立場不同，亦都牽涉選舉利益考量。皆因若果劉梁都被取消議員資格（DQ），九龍西同新界東補選就會變成雙議席單票制選舉，對泛民更冇着數。
點解多咗議席需要補選，對泛民反而不利呢？有泛民中人分析，如果只有游梁兩人被DQ，九西同新東補選就等同單議席單票制補選。按照人大釋法內容，游梁或其他港獨人士即使重新報名參選，相信九成九都過唔到選舉主任嗰關。只要非建制陣營可以協調到每區都只派出一人參選，就幾乎肯定贏硬。
黃金定律 反有利建制
若果劉梁等四人都被DQ，九西同新東就要同時填補兩個議席，變成雙議席單票制選舉。根據六四黃金定律，兩區嘅補選結果都一定係建制派同非建制各取一席，無一方可以喺同一區全取兩席，泛民似乎唔會蝕底。
問題係現年只有四十歲嘅劉小麗，肯定會喺DQ後捲土重來，重新參加補選。已達花甲之年嘅梁國雄就算自己唔選，預計亦會推舉黃浩銘等社民連第二梯隊出戰。由於兩人向來都並非支持港獨，今次純粹係因為喺宣誓時玩嘢而被DQ，相信選舉主任好難阻止佢哋再次參選。
倘DQ劉梁 泛民陷兩難
其他泛民黨派喺呢個情況下再派人參選，肯定會被指不顧道義同存心鎅票，好難獲得大多數非建制選民投票支持。就算最後真係由泛民候選人勝出，輸嘅亦一定唔會係建制派，而係劉小麗同梁國雄，效果上等同DQ多兩人一次，變咗政府嘅幫兇。故此只有劉梁不被DQ，其他泛民先有機會一博，所以想唔撐佢哋都唔得喇！