中環出更：醫界名人 創業各有睇法
香港人近年興創業，不過並唔係人人都適合行創業之路。尋日有一個醫學診斷中心開幕，好多名醫同名人去捧場。標準工時委員會主席梁智鴻（金刀梁）太太、香港放射科醫學院前院長梁馮令儀（Lilian）就話，創業殊不簡單，佢就無選擇自立門戶開診所，走上創業路，而係專注教學，希望傳授醫學知識畀下一代。
Lilian話，香港一定要保持到高嘅醫學水平，唔容許醫生出現錯漏，所以佢醉心教學工作，希望將佢對放射科嘅知識傳承落去。佢仲話，科技日新月異，所以從事放射性工作就要不停進修，學習新技術，佢亦經常同海外醫學組織交流，甚至邀請對方來港，實行為業界出一分力。
羅詠詩睇好醫療旅遊潛力
金刀梁取態明顯同太太唔同，佢喺香港大學任教十七年，最終都係出走打自己工。金刀梁解釋，若留喺港大教書只可服務醫學界，離開可以換取更多時間擔任公職，對社會貢獻更多，難怪佢有「公職王」之稱喇！
同場仲有百仁基金副主席羅詠詩，佢睇好香港發展醫療旅遊嘅潛力，認為業界可以諗吓吸引內地人士來港旅遊順道求醫。港鐵主席馬時亨及太太都有現身，事關佢女婿劉仲恒有份開呢間診斷中心。馬時亨話，女婿及囡囡劉馬露明都行創業呢條路，好忙碌，所以佢同太太早前搬去佢哋樓下住，方便幫手湊孫。創辦教育中心嘅劉馬露明就話，創業首年最為艱辛，因為要由零開始。創業「初哥」劉仲恒笑稱，經過一輪掙扎先決定創業，好彩有太太扶持！
卓妮