教育局局長吳克儉（吳得掂）五年任期內劣迹斑斑，搞到犯眾憎。立法會財務委員會尋日討論下屆問責官員加薪事宜，花名叫一舊雲嘅民主黨立法會議員黃碧雲唔知係咪嬲得滯，繼續發揮發夢本領，開大炮狂鬧吳得掂，形容加佢人工咪即係「散水餅」喎！其實加人工係下一屆高官先有，吳得掂想做多一屆都難，一舊雲喺旁人提點之下，都繼續錯、繼續鬧，又真係幾搞笑。不過日前有前立法會議員揚言可以畀足半年人工，叫吳得掂快快走人，可見呢位局長真係冇人鍾意囉！
