政情：肥老闆滑雪怕跌致「地震」
唔少人都會趁農曆新年假期同家人去旅行，享受天倫樂。立法會金融服務界議員張華峯（肥老闆）嚟緊春節都會同屋企人一行十幾人去日本札幌玩五日。肥老闆話今次主要係帶兩個孫仔去學滑雪，唔知肥老闆會唔會親自教佢哋呢？佢就講笑話，以佢體重二百五十磅嘅分量，如果唔小心跌親就會「地震」，所以佢都係請其他人教孫仔喎！
肥老闆講到咁，唔通佢打算齋睇唔落場？佢話其實唔滑雪都有好多嘢玩，例如坐滑雪兜，佢試過坐滑雪兜被幾隻狗拉住喺雪地上滑行，都好過癮喎。話時話，肥老闆「重量級」嘅身形，唔知滑雪服裝使唔使特別訂造？佢就話自己嘅身形其實喺外國都好普遍，亦唔係最大碼，所以買衫冇難度。
大讚日本涮涮鍋好味
除咗滑雪之外，喜愛美食嘅肥老闆當然唔少得去品嘗日本料理，佢大讚日本涮涮鍋好好味。不過，早前札幌暴雪搞到唔少人滯留機場，要瞓地下，如果肥老闆唔好彩遇到大雪滯留機場，冇啖好食點算呢？佢就話每次去旅行都會帶定即食麵，以防萬一喎。