政情：吳清煥創意「晶」心做童裝
近年商界人人呻生意難做，不過中華廠商聯合會副會長吳清煥盤服裝生意就愈做愈旺，舊年仲增長七成添！點解咁好景？玩創意係不敗秘訣。吳清煥喺內地開咗二百幾間童裝零售店，除咗因為食正內地開放二胎政策，所以生意唔錯之外，佢不斷推出有創意嘅產品亦係成功原因。呢兩年佢就出產內植晶片嘅功能戶外童裝外套，就算小朋友走失都可以追蹤到，自然吸引到一眾驚小孩被拐帶嘅父母幫襯。
拐帶歪風轉化商機
吳清煥話，內地拐帶歪風屢見不鮮，所以早前佢就利用定位科技潮流，將晶片放入童裝外套。若果小朋友走失，家人即可用手機追蹤，不過前提梗係小朋友仲着住件衫至得啦！
除此之外，佢亦不斷提升外套質料，最近就出咗一種可防水、防風又防火嘅保暖外套，用嘅係類似消防衣嘅特殊物料，就算三百幾度高溫都燒唔爛，但係又冇消防衣咁焗，透氣性好啲。最近佢去零下十度嘅蘇格蘭玩，就好瀟灑咁只着一件衫，外加一件保暖外套，搞掂！