政情：民主派爛橙特首照啃 長毛鬧袋巾「十年冇翻身」

林鄭故宮館一役「露底」

袋巾傑喺節目中指出，林鄭月娥過往形象較接近公民社會，但自從「執梁振英二攤」後，成個人都變晒，尤其喺西九故宮館一役「露底」，為咗令中央覺得自己「有料到」，林鄭繞過所有規矩，完全唔顧香港一貫嘅行事作風，民主派冇可能支持以延續梁振英路線自居嘅候選人。

袋巾傑又話，鬍鬚曾雖然達唔到民主派嘅期望，但社會上確有種一廂情願嘅民情，希望未來五年無為而治，休養生息，民主派有需要回應，認真思考三百幾名選委如何處理特首選舉，「無論係佢（曾俊華）夠hea，抑或做得冇咁橫蠻、有啲規矩……爛橙中揀一個，的確係揀曾俊華」。

支持建制派或致分裂

曾表態有意參選特首嘅長毛反駁，若民主派將選票授權建制派候選人，「十年都唔使翻身」，甚至會令民主運動中最有信念嘅人離開。佢相信曾俊華已夠票入閘參選，民主派選委不應為他人作嫁衣裳。

其實長毛今次都講得幾有道理，既然你話個個橙都係爛，唔食咪得囉！點解一定要揀呢？我哋早前影到鬍鬚曾同壹傳媒黎智英（漢奸黎）嘅親友喺司長官邸密會三個半鐘，令人懷疑漢奸黎正暗中支持鬍鬚曾。唔知袋巾傑今次突然提出「爛橙論」，同作為民主派最大金主嘅漢奸黎有冇關連呢？