中環出更：示威者默站抗議漢奸黎「黑金政治」
壹傳媒黎智英（漢奸黎）被揭發多次秘密捐款畀泛民政團同立法會議員，甚至因此而搞到畀廉政公署調查。尋日就有市民先後去到漢奸黎嘅寓所外面，拉起「政治黑金黎智英」等字句嘅橫額，以默站嘅方式抗議。
尋日朝早七時許，十九名聲稱自發嘅市民去到漢奸黎位於何文田嘅寓所附近，其中有人喺漢奸黎寓所外影相，黎宅保安出言制止，不過佢哋就話自己係香港居民，有權使用道路，又話希望到場「吸有錢人旺氣」，之後就返回附近行人路會合其他人。
手持橫額批操控選舉
示威者抗議期間高舉五星旗同區旗，手持印有「政治黑金黎智英」、「漢奸黎智英操控選舉」字句嘅橫額，不過就冇叫任何口號，只係以默站方式表達不滿，警員一度到場了解。示威者逗留四十分鐘後散去，至下午四時示威者再重返黎宅，但因為落雨，佢哋逗留咗五分鐘就離開喇。
自去年六月十日起計，到漢奸黎寓所及將軍澳壹傳媒大樓外示威嘅行動最少達一百廿二次，當中自稱霸王國際集團員工及苦主佔十次、正義聯盟三次，旅遊業界及其他人士則有一百零九次。
卓妮