中環出更：粵劇細看中史 誠意推薦
好多年輕人一聽到話要睇粵劇就覺得眼瞓，仁濟醫院早前舉辦「仁濟愛心慈善粵劇粵曲晚會」，卓妮見到仁濟總理鮑誠業（Sammy）。佢話都曾經覺得睇粵劇好悶，不過自從幫手籌備咗五年粵劇粵曲晚會後，就開始對粵劇改觀，漸漸識得欣賞，發現當中好多內容都同中國歷史相關，如果能夠將粵劇年輕化，將有助學生培養對中國歷史嘅興趣。
Sammy話，好多粵劇內容都係講述唔同年代帝王將相嘅生平事迹，過往未睇過以為粵劇好老土，但認真睇就覺得好有趣。其實香港仲有好多粵劇戲迷，當晚嘅劇目亦非常賣座，全院滿座，有撲唔到飛嘅戲迷仲專程到場，睇吓有冇人臨時有飛出讓添！
當晚好多仁濟人都有到場，包括仁濟副主席嚴徐玉珊、仁濟總理暨大會主席張文嘉、總理孫蔡吐媚，仲有一眾顧問梁昌明、尹志強及當年顧問何德心太太何歐陽翠華等。梁昌明嘅媽媽梁劉靜慈當晚都有份演出，所以梁昌明專程由外地趕返香港支持。張文嘉話，善款會用於該院旗下教育服務基金，包括為中學添置3D打印機、設立仁濟國際學生創新發明大賽等，以支持中小學嘅科技教學需要。
嚴徐玉珊興奮談「好」孫
過多三個月，嚴徐玉珊將升任仁濟主席，佢笑笑口話心情好緊張，半年前已開始預備來年嘅工作，例如六月就會籌辦一場嘉年華。嚟緊新年佢就唔會出去玩，因為新抱即將臨盆，現時大孫女兩歲幾，嚟緊抱埋孫仔就湊成個好字，講起就開心。
卓妮