政情：求婚成功 楊岳橋預告未必生仔
立法會議員兼公民黨黨魁楊岳橋（Alvin）日前被爆求婚成功，未婚妻「陳小姐（Eve）」更首次曝光，唔少女粉絲都為之心碎。點知，Alvin仲隱藏住一個重大秘密，原來佢未來外父或外母其中一個係退休警察，唔知道佢哋政見同Alvin咁唔同，會唔會日日家嘈屋閉呢？
Alvin日前被爆成功向拍拖四年嘅女友求婚，即將會拉埋天窗。據知，未婚妻姓陳，英文名係Eve，本身係一個事務律師。Alvin接受查詢時就承認，未來外父或外母其中一個係退休警察，但就否認因為未婚妻家庭背景而神神秘秘，反而係因為私人事而唔想對外公開。
講到未來外父、外母政見或者背景，Alvin就不願多談，話唔好騷擾老人家喇！不過，佢大讚未婚妻「爽朗、聰明、有主見」，好處多到講唔完。佢話雖然已經求婚，但未定婚期，一有消息會通知大家，又話就算結婚都未必會生仔喎。點都好喇，真係恭喜晒Alvin喇！