政情：今日你上鏡：吳永嘉食勻澳洲要減肥

立法會仲休緊會，議會新丁吳永嘉（Jimmy）就把握時間同太太及朋友一齊去澳洲旅行叉叉電。今次澳洲之旅除咗去獵人谷（Hunter Valley）參觀酒莊同朱古力廠之外，仲專登去埋當地最著名嘅海灘影相留念。有美景，當然唔少得美酒同美食啦！Jimmy參觀酒莊時，喺獵人谷最著名嘅法國餐廳食咗威靈頓牛扒、焗龍蝦伴蝦肉、雪糕伴鹹班戟，每道菜仲要配唔同餐酒。今次旅程食咗咁多好嘢，Jimmy就話返香港之後要積極做運動，睇怕佢都要計劃好點樣減肥喇！