政情：李慧詩學生Look返母校探老師
「牛下女車神」李慧詩（Sarah）嘅戰衣Look，相信大家都見得多，之但係佢嘅學生妹Look又有冇見過？Sarah尋日喺facebook上載咗一張穿着校服嘅相片，仲話感謝校長、老師同師妹們，原來佢喺二○一七年嘅首天回到母校梁式芝書院，相約老師喺元旦假期敍舊。Sarah話依家屋企仲留有當年着嘅中學校服，但嗰日臨時諗起想同老師一齊影張校服Look嘅相，於是喺學校借咗套校服嚟影相留念。
回到母校，Sarah回憶最深嘅係禮堂同音樂室，而除咗體育課外，佢最愛嘅課堂就係音樂堂同美術堂，難忘與同學一起學牧童笛嘅時光，佢又話雖然美術唔係自己強項，但好享受上美術課嘅氣氛。
Sarah中學時係田徑校隊，更因運動場上表現突出而被推薦加入體育學院計劃並踏上單車之路，依家回想佢仍覺得中學期間最開心係每年嘅陸運會，佢都會參加一百米同四百米跑步比賽。