政情：故宮館玩保密 林鄭內外引火

立會解畫 料兩派齊轟

正所謂「醜婦終需見家翁」，搞出西九故宮文化博物館呢個大頭佛，林鄭事前沒諮詢立法會，但最終都要去內會交代。內會主席李慧琼預料，屆時將會觸及當局與內地備忘錄嘅細節。雖然有傳今次內會屬建制派幫林鄭拆彈，但唔代表建制派個個都順氣。有一直關注西九嘅建制派話，雖然支持興建故宮文化博物館，但批評林鄭在公布前，根本冇講一聲，大家當時都相當訝異，加上項目資料高度保密，唔少建制派都不太理解細節，想幫手救火都唔知點救，完全唔當建制派係隊友，咁就等政府自己解釋。

建制派有火氣，民主派更加唔會畀面。建築界議員姚松炎表明，將喺內會促請林鄭解釋三大疑團，第一，項目對西九整體規劃嘅影響；第二，直接委任建築師嚴迅奇設計等同黑箱作業，亦唔符合廉政公署相關指引，而該指引正正為咗避免發生任何貪污行為，亦唔符合政府相關採購指引；第三，當局根據邊種法定權力不諮詢公眾，並繞過立法會。

至於公民黨陳淑莊預告開會前，會要求當局提交文件，交代林鄭半年前僅諮詢兩名董事局成員，係咪等同「摸底」，以及同董事局相關簡介會嘅會議紀錄，會議上就會要求林鄭交代，當初同故宮商討時，如果係用董事局主席嘅身分，有冇獲局方授權；以及邊個決定由嚴迅奇設計等等。

建築界選委強烈譴責

議會外亦有建築界選委追擊林鄭，建築界選委L5團隊尋日發聲明，強烈譴責西九管理局漠視專業判斷，要求管理局向公眾清楚交代所有細節，以及就興建故宮文化博物館及其位置作詳細研究及諮詢。

雖然近日有建制派急急腳成立「支持興建香港故宮文化博物館大聯盟」想幫拖，但係林鄭依家內外都着晒火，恐怕都係為時而晚，歸根究底，完全係自己攞嚟嘅。