中環出更：蔣麗芸漁農展掃心頭好

一年一度嘅漁農美食迎春嘉年華喺旺角花墟公園舉行，立法會議員蔣麗芸（Ann姐）就把握呢個黃金機會，一方面去支持吓本地嘅漁農業，另一方面就去大掃心頭好，前日就開開心心攞住大包細包咁離開。

Ann姐尋日上載咗幾張相到社交網站facebook，同大家分享佢嘅「戰利品」。佢話無論濕貨乾貨都買齊晒，蟹腳、龍蝦尾、榴槤班戟等買到滿載而歸。佢又話自己都鍾意食榴槤，但今次係專登買畀老公，仲爆響口話老公一見到榴槤就會好瘋狂！掃貨時刻都記住要買埋老公嗰份，Ann姐果然夠體貼。

不過，最令Ann姐開心嘅就係買咗三棵薄荷葉、迷迭香同沙律生菜返屋企慢慢種。佢話好鍾意飲lime juice（青檸汁），如果放一片薄荷葉落去就會香好多，但平時去街市買嘅薄荷葉擺兩日就已經唔用得，今次買一棵返屋企種就可以解決呢個問題。

佢仲話屋企一向都有種開番茄及辣椒，所以薄荷葉應該唔太難種，又教路話平時只要記得淋水同用洗米水施肥就得。既然咁簡單，佢又會唔會攞一棵返立法會種呢？

卓妮