中環出更：避醫生傳統 謝鴻興怕求診
普通人生病會睇醫生尋求治療，但當醫生都變咗病人時，竟然選擇唔睇醫生，唔通連佢哋都諱疾忌醫？香港牙醫學會早前舉行周年晚會，吸引到唔少名醫到場，好似港大醫學院院長梁卓偉、食物及衞生局局長高永文及副局長陳肇始等。香港醫學會前會長謝鴻興都係座上客，佢就揚言怕咗睇醫生，但原因竟然同醫生圈子嘅傳統有關喎。
謝鴻興話醫生圈子中有一個傳統，就係對同業嘅診金只作象徵性收費，所以就搞到佢求醫時覺得非常唔好意思囉！佢話試過光顧完全唔認識嘅醫生，希望可以避開呢種情況出現，但都係失敗告終，因為作為醫學會前會長嘅佢依然被認出，難怪佢話驚咗睇醫生喇！除咗西醫，謝鴻興透露連睇牙醫都係費用全免添！不過，佢今次就無話唔好意思喇，因為佢太太嘅細佬從事牙醫，多年嚟都負責佢一家嘅口腔健康咁話。
陳沛然試過古法剝牙
立法會醫學界議員陳沛然（Pierre）就話，家人生病都係佢自己醫，唔會假手於人，但牙醫都要出去睇。不過，佢就話囡囡試過牙痛，更搞到發燒，但因為正值大年初一搵唔到牙醫診所，所以只能靠佢開藥止痛頂幾日喇！
唔好睇Pierre讀醫出身就會比較着重科學，其實佢細過時用過古法剝牙，就係將線嘅一端綁喺牙上，而另一端則綁喺門柄上，趁唔覺意大力閂門而剝牙囉。佢憶述起都話痛，但就搞鬼話都想用呢個方法幫囡囡剝牙，但老婆唔批准囉！
牙醫學會會長梁世民聽到就擰擰頭，話唔建議用古法剝牙，認為最穩陣都係搵專業牙醫幫手。不過，佢就讚港人近年多注重口腔健康，希望未來可以有全民牙科保健，但就直言好難實現呢個願望，因為人手唔足以應付。
卓妮