政情：龍鳳大禮堂「重現」梁智宏回味當年
去酒樓飲茶係唔少香港人嘅生活習慣，要數經典茶樓，鑽石酒家嘅龍鳳大禮堂都盛載唔少港人回憶。鑽石酒家後人梁智宏（Andrew）話，雖然酒家多年前已經結束實體店業務，但最近香港文化博物館舉辦清帝大婚慶典展覽，亦有展出佢哋當年龍鳳大禮堂嘅全副擺設，一碗一碟金光燦爛，場景同昔日上環舖內一模一樣。
Andrew話○二年酒樓結業後，就將酒家內龍鳳大禮堂嘅雕刻、雕柱等裝修、枱櫈擺設同餐具等捐晒畀博物館，今次展覽勾起佢唔少童年回憶。佢又話以前每個禮拜都會同公公婆婆飲茶，對推車仔叫賣點心嘅情景記憶猶新，其中酒家有啲菜式亦不復再，好似特製嘅甜品西米蓮蓉梳乎厘同煎完再焗嘅煙（魚倉）魚，依家想食都搵唔番嘞！