本報又代冇神經政府做了一件好事，踢爆致癌拖鞋隨處賣！呢個世界太恐怖了，日常呼吸嘅空氣有毒、食物有毒、食水含鉛……家陣連着對拖鞋都有機會中毒，天啊！東網記者觸覺可謂敏銳，知道平嘢未必可靠，於是把三對兒童及三對成人塑膠拖鞋交予香港浸會大學生物系研究團隊，檢測下發現六個樣本的鉛含量均超標，當中鉛含量超標最高的樣本達八百多ppm，鄰苯二甲酸酯含量達百分之五點七四。
專家指出，此類化學物質可經皮膚滲入身體，長時間吸入鉛，輕則肚痛、抽筋、嘔吐，重則會令兒童發展遲緩，認知能力受損，智力大減，而成人會記憶力衰退，精子數量減少，女性則容易小產。而鄰苯二甲酸酯會干擾內分泌，女性有機會患乳癌，亦會使兒童出現性早熟，孕婦則會生畸胎。老朽當堂標晒冷汗，因日前才在深水埗買了對膠拖，若然就此改變我下半生的「性福」，豈不嗚呼哀哉？原來爸爸的草鞋才最安全，老朽不懂編織草鞋，只好學野村那耕種的老叟赤腳播種割菜，難怪他九十歲，生命仍如此充滿韌力！
其實，冇神經政府罔顧港人健康，把關不力，真係一匹布咁長，講都講唔完，唔該快啲就家居及個人用品訂立有關含量標準，唔好死撐話喺市面抽驗嘅塑膠拖鞋產品經過測試，全部合乎一般安全規定！
講開無良商人放毒，老朽記得去年江蘇常州外國語學校遷新址後，有近五百名學生檢查出患皮膚病，個別更得了淋巴癌、白血病。專家稱，校區受到的污染與化工廠地塊的污染物脗合。事實上，內地近年「毒土地」、「毒跑道」事件頻頻曝光，不少小學和幼稚園都有家長反映相關現象及孩子的不良反應。其實，無良商人之所以能夠大肆放毒，還不是政府監管不力之故？少年強則中國強，如今無良商人頻頻放毒，少年唔死都一身潺，如何會強？