政情：鄧家彪外遊見證 博物館港不如星
唔少政界中人都把握聖誕佳節嘅機會，去旅行放鬆吓。立法會前議員鄧家彪（Bill）日前就去咗新加坡嘅藝術科學博物館，仲有感而發話香港嘅博物館無論喺訪客人數同知名度上嘅表現都相當遜色，提醒啲高官去虛心考察添！
提醒高官「虛心考察」
阿Bill話之前有朋友介紹佢去呢個博物館，雖然博物館地方唔大，但設計相當貼心，大、小朋友都可以玩填色畫畫，仲可以將手畫嘅海洋動物即場投影成為動畫添！佢一見到咁貼心嘅設計，自己就變咗個「大細路」咁，親自落手畫咗一隻「生猛而邪惡的大魷魚」，畫功真係幾好！但最令佢欣賞嘅，係地方細細都夠小朋友玩足幾個鐘，科技又型又好玩，好容易就令小朋友着迷。
反觀香港咁多間博物館，無論係訪客人數定係知名度，表現都相當遜色，阿Bill就提醒香港一眾高官，話香港科學館就快要翻新「請高官嚟虛心考察，為香港做好啲。」